لەوانەیە هەست بە ئازاری گورچیلە بکەی لە بەشی سەرەوەی سك یان لە تەنیشت و پشتت. بەڵام زۆرجار ئازاری ئەم شوێنانە پەیوەندی بە گورچیلە نییە. هۆکاری زۆر هەیە بۆ ئازاری گورچیلە. هەندێک هۆکار لە هەندێکی تر جددیترن.

• بەردی گورچیلە: بەردی گورچیلە یەکێکە لە هۆکارە باوەکانی ئازاری گورچیلە. بەرد کاتێك دروست دەبێت کە کانزا و ماددەکانی تر لەناو میزدا ڕەق دەبن و کریستاڵ دروست دەکەن. زۆرجار بەردی گورچیلە دەبێتە هۆی ئازارێکی زۆر، تەنانەت دەتوانێت ڕێگری لە ڕۆیشتنی میز بکات. ئەگەر بەردەکە زۆر گەورە بێت و لەگەڵ میز نێتە دەرەوە، ئەوا پێویستی بە چارەسەری وەك نەشتەرگەری یان ڕێگای تر هەیە.
• هەوکردنی گورچیلە: هەوکردنی گورچیلە مەترسیدارە. زۆرجار بەهۆی بەکتریاکانی ناو بۆڕی میز دروست دەبێت کاتێك دەگەنە ناو گورچیلە. نیشانەکانی بریتین لە تا، لەرز، سکچوون، ڕشانەوە، ئازار لە تەنیشت یان پشت و لێڵ بوونی ڕەنگی میز، یاخود بوونی خوێن لەناو میز. ئەم هەوکردنە حالەتێکی فریاگوزارییە و پێویستی بە چارەسەری دژە زیندەیی هەیە.
• شێرپەنجەی گورچیلە: ئەمەش زۆر باو نییە. یەکێك لە نیشانە سەرەکییەکان بریتییە لە بوونی خوێن لەناو میز سەڕەرای ئازاری گورچیلە و دابەزینی کێش و ماندوێتی. چارەسەرەکەی بەزۆری بە نەشتەرگەری، چارەسەری تیشکی، یان چارەسەری کیمیایی دەبێت.
• نەخۆشی فرەکیسەی گورچیلە: نەخۆشییەکی بۆماوەییە کە دەبێتە هۆی دروستبوونی کیسە لەسەر گورچیلە و چوارەم هۆکاری سەرەکی لەکارکەوتنی گورچیلەیە. نیشانەکانی بریتین لە ئازاری گورچیلە، زەخت، بوونی خوێن لەناو میز و بەردی گورچیلە.
• گیرانی خوێنهێنەری گورچیلە: کاتێك خوێن مەیین لە خوێنهێنەری گورچیلە ڕوودەدات دەبێتە هۆی گیرانی، کە حالەتێکی مەترسیدارە و دەبێتە هۆی لەکارکەوتنی گورچیلە. جگە لە ئازاری گورچیلە، نەخۆشەکە خوێن لەناو میزی دەبێت و قاچەکانی دەئاوسێن.
• کیسی گورچیلە: ئەمەش کیسەیەکی پڕ لە شلەیە کە لەسەر گورچیلە دروست دەبێت. ئەم حالەتە تا ڕادەیەك باو و ئاساییە، زۆربەی خەڵک تا دەگەنە تەمەنی ٥٠ ساڵی لانیکەم کیسی گورچیلەیان هەیە. زۆربەی ئەم کیسانە نابنە هۆی شێرپەنجە و بێ نیشانەن، بەڵام هەندێك جار زۆر گەورە دەبن و ناڕەحەتی زۆر بۆ نەخۆش دروست دەکەن. لەم کاتە پێویستە لاببرێت بە نەشتەرگەری یان ڕێکارەکانی تر.